في ميلادي السعيد
الـ مش سعيد

والسنادي 
في يوم ميلادي 
كان نفسي ابدا من جديد 
و دا مش جديد 
ولكني يوم عيد الميلاد 
بقول حاجات 
وانوي حاجات 
واحلم حاجات 
تشبه كتير 
كل الحاجات المتقالين 
والمحلومين 
من عمر فات

كان نفسي ابدا من جديد 
وبعيده خطوط البدايه .. بعيد 
اليوم ..و في ميلادي السعيد 
الـ (مش سعيد) لا فيه شيء بيبعث ع الفرح 
ولا حزن عابر يستحق الاحترام 
واليوم 
يشبه امبارح تمام 
ولا شيء جديد غير بس تمنية بالتمام 
تلاتين سنه 
وزياده.. عام 
ولا ليا بيت ولا جوا هذا البيت ولد له ام اجمل م السما و م الحياه تبقي المدام 
ولا حتي وردة صغيره جواها شيء و ف قلبي شيء ناحيتها 
بنقوله ف كلام فـ مفيش كلام 
والورد كله ف حينّا بقا له عيال تشبه لـناس  
مافيهومش شيء مني انا 

اما انا وحدي انا وكإني تمثال من رخام و ايه ح يشبه للرخام 
غير الرخام. 
رابع سنه 
رابع ميلاد 
موصلش من عالم بعاد كلمة سلام في جواب عديم الصدق مكتوب ع السريع 
امنيه بزوال المحن 
لوصول شريط العمر 
لبلاد الربيع 
ووفاه ملائمه 
وفيها شيء م الارتياح 
وقت ما يزورني الصباح فايديه حبيب ظنيته راح 
فـ راح 
ولا جتلي كلمه من صديق قديم بالصدفه قابل والدي مره ع الطريق 
كان ف الطريق بيجيب لي اقراص الاكتئاب وعلاج لتقل القلب ويجيب لي كتاب روايه عن عاشق قديم 
فاق فـ انتحر 
لما اكتشف ان الطريق اخره سراب 
ولما التقي صاحبي وابويا علي الطريق فـ التقي شيء في العينين 
شيء ملتبس وماهوش حنين 
فـ لحفظ ماء الوجه قام سأل السؤال 
" عامل ايه 
فات الكتير 
احواله تبقي يارب عال " 
قام ابويا ولزوم الارتجال 
ببساطه قال
"شكراً امين " 
ده سيناريو سازج 
وان حصل 
ح يكون حزين. 
فاتت سنه 
وكمان سنه 
وسنه وسنه
مع بعض يتعدوا سنين 
سنين كده 
و سنين كده 
سنين سَخَط 
و سنين رضا 
و سنين سعاد 
و سنين حداد 
سنين خفاف 
و سنين شداد
كُلك في عمري معدودين 
كُلك في قبري مربوطين 
العمر رايح ولا جاي! 
العمر كان لحظه عطش 
مديت إيدينا يادوب في يّم الكاس 
عدت سنين تلاتين
لمست الكاس 
عدت سنه 
حسيت ببرد الكاس 
يا هل تري 
عمري اللي فاضل 
حِّ يكفي عطشان يرتوي 
ولا الحياه ح تفوت في شربة مَيّ 
ولا الحياه ح تفوت في شربة مَيّ 
ياعمري رايح ولا جيّ؟

البحيرى 6/27/2021 طرة